Ветковский районный исполнительный комитет

03.11.2020

Выкананне гігіены рук дае магчымасць знізіць рызыку інфіцыравання каранавірусам

3 лістапада, Мінск /Кар. БЕЛТА/. Выкананне гігіены рук дае магчымасць істотна знізіць рызыку інфіцыравання рэспіраторнымі вірусамі, у тым ліку вірусам грыпу і каранавірусам, што выклікае COVID-19, паведаміла БЕЛТА загадчыца аддзялення нагляду за арганізацыямі аховы здароўя ДУ "Рэспубліканскі цэнтр гігіены, эпідэміялогіі і грамадскага здароўя" Святлана Грыгор'ева.

Яна звярнула ўвагу: калі няма магчымасці вымыць рукі з мылам, неабходна апрацаваць іх дэзынфіцыруючым сродкам (антысептычным сродкам для скуры рук) на спіртавой аснове або выкарыстоўваць дэзынфіцыруючыя сурвэткі. Пры набыцці такога сродку спецыялісты раяць прачытаць інструкцыю або ўдакладніць у прадаўца, ці актыўны ён у дачыненні да вірусаў і як яго выкарыстоўваць для дасягнення эфекту.

"Важна, каб сумарны час апрацоўкі рук быў не меншы за 30 секунд, таму колькасць антысептычнага сродку павінна складаць не менш за 3-5 мл. Змываць сродак вадой няма неабходнасці", - сказала Святлана Грыгор'ева.

Знаходзячыся ў гандлёвым цэнтры, арганізацыі ахове здароўя, іншым грамадскім месцы трэба выкарыстоўваць магчымасць апрацоўкі рук з дапамогай устаноўленых дазатараў (дыспенсераў).

Загадчыца аддзялення нагадала аб базавых правілах эфектыўнага мыцця рук з мылам. Паводле яе слоў, на гэта павінна ісці не менш за 20 секунд. Важна не забываць пра вобласці паміж пальцамі, вакол ногцяў, кутыкулы і вялікага пальца. Аддаваць перавагу лепш вадкаму мылу. Кускавое павінна захоўвацца ў сухой і чыстай мыльніцы, інакш яно само можа стаць крыніцай перадачы вірусаў і бактэрый.

"Чыстыя рукі - гэта гарантыя таго, што вы не будзеце распаўсюджваць вірусы, інфіцыруючы сябе, калі датыкаецеся да рота і носа, і людзей, якія знаходзяцца побач, - праз кантактныя паверхні", - рэзюмавала Святлана Грыгор'ева.