29 студзеня, Мінск /Кар. БЕЛТА/. У Беларусі вызначаны парадак выключэння з абарачэння, вяртання, вывазу і ўтылізацыі небяспечнай прадукцыі. Адпаведная пастанова Савета Міністраў ад 27 студзеня 2021 года нумар 43 афіцыйна апублікавана сёння на Нацыянальным прававым інтэрнэт-партале, паведамляе БЕЛТА.

Дакументам зацверджана палажэнне аб парадку выключэння (адклікання) з абарачэння, вяртання, вывазу, утылізацыі небяспечнай прадукцыі для недапушчэння абарачэння такой прадукцыі на тэрыторыі Беларусі. Яго дзеянне не распаўсюджваецца на небяспечную прадукцыю, выключаную, арыштаваную або накіраваную ў даход дзяржавы ў парадку, устаноўленым заканадаўчымі актамі.

Аднясенне прадукцыі да катэгорыі небяспечнай будзе ажыццяўляцца кампетэнтнымі органамі па выніках лабараторных даследаванняў (выпрабаванняў), праведзеных у акрэдытаваных выпрабавальных цэнтрах (лабараторыях), а таксама на падставе дакументаў, аформленых па выніках знешняга агляду. Спыненне ўвозу і (або) абарачэння небяспечнай прадукцыі на тэрыторыі Беларусі, яе выключэнне з абарачэння будуць ажыццяўляцца суб'ектам гаспадарання на падставе прадпісання, вынесенага кампетэнтным органам. Пры атрыманні такога прадпісання ў тэрмін не большы за 10 рабочых дзён з даты яго атрымання суб'ект гаспадарання павінен вызначыць магчымасць прывядзення небяспечнай прадукцыі ў адпаведнасць з патрабаваннямі тэхрэгламентаў і праінфармаваць аб прынятым рашэнні ў пісьмовай (электроннай) форме кампетэнтны орган. Тэрмін прывядзення небяспечнай прадукцыі ў адпаведнасць з патрабаваннямі тэхнічных рэгламентаў не павінен перавышаць двух месяцаў. Суб'ект гаспадарання пры гэтым абавязаны пацвердзіць вынік прывядзення такой прадукцыі ў адпаведнасць з патрабаваннямі тэхрэгламентаў праз адпаведную працэдуру ацэнкі і не пазней за тры рабочыя дні пасля пацвярджэння праінфармаваць аб гэтым кампетэнтны орган.  Калі ў Беларусі не будзе акрэдытаваных органаў і выпрабавальных цэнтраў з неабходнай сферай акрэдытацыі суб'ект гаспадарання можа звярнуцца ў акрэдытаваныя арганізацыі іншых дзяржаў - членаў Еўразійскага эканамічнага саюза. Таксама ў дакуменце гаворыцца, што, калі небяспечная прадукцыя не можа быць прыведзена ў адпаведнасць з патрабаваннямі тэхнічных рэгламентаў у вызначаны палажэннем тэрмін, ён утылізуецца або вяртаецца.

Палажэннем таксама вызначаны парадак дзеянняў суб'екта гаспадарання пасля атрымання прадпісання. Дакументам устаноўлена, што прадстаўнікі кампетэнтнага органа маюць права прысутнічаць пры правядзенні ўтылізацыі небяспечнай прадукцыі.

Пастанова ўступае ў сілу пасля яе афіцыйнага апублікавання.