03.10.2024

У Беларусі сабрана больш за 9 млн тон збожжа з улікам рапсу

Аграрыі рэспублікі, паводле даных на 2 кастрычніка, сабралі 9,085 млн т збожжа з улікам рапсу, паведамілі БЕЛТА ў Міністэрстве сельскай гаспадаркі і харчавання.

Нагадаем, учора ў Мінсельгасхарчы пад старшынствам намесніка прэм'ер-міністра Юрыя Шулейкі з удзелам кіраўніцтва сельскагаспадарчага ведамства, супрацоўнікаў Нацыянальнай акадэміі навук Беларусі і навукова-практычных цэнтраў прайшла нарада па абмеркаванні праблемных пытанняў у галіне раслінаводства і жывёлагадоўлі, пошуку шляхоў іх вырашэння.

У ходзе нарады віцэ-прэм'ер паставіў шэраг важных задач па правядзенні абследавання пасеваў сельскагаспадарчых раслін з улікам існуючых умоў надвор'я ва ўсіх рэгіёнах рэспублікі і выпрацоўцы рэкамендацый сельгасвытворцам, накіраваных на зніжэнне ўплыву негатыўных фактараў (нізкі ўзровень вільгаці ў глебе), па правядзенні маніторынгу ходу асенняй пасяўной кампаніі і наяўнасці тэхнікі для правядзення работ у агратэхнічныя тэрміны, па захаванні тэхналогіі ўтрымання і кармлення буйной рагатай жывёлы.

Міністр сельскай гаспадаркі і харчавання Анатоль Ліневіч у час нарады звярнуўся да кіраўніцтва навукова-практычных цэнтраў з неабходнасцю аказання садзейнічання ў выпрацоўцы прапаноў для вырашэння праблемных пытанняў галіны і выхаду аграпрамысловага комплексу на новы тэхналагічны ўзровень. Кіраўнік ведамства абазначыў, што аналагічныя нарады кіраўніцтва міністэрства і навукова - практычных цэнтраў будуць праводзіцца на пастаяннай аснове-штотыдзень.

БелТА