22 лютага, Мінск /Кар. БЕЛТА/. Праект указа аб адчужэнні жылых дамоў і ўдасканаленні работы з пустуючымі і старымі дамамі ўзгоднены з усімі зацікаўленымі, паведаміў старшыня Дзяржаўнага камітэта па маёмасці Дзмітрый Матусевіч у эфіры праграмы "Тыдзень" на тэлеканале СТБ, паведамляе БЕЛТА.

Заканадаўчая ініцыятыва накіравана на ўдасканаленне парадку ўключэння ў абарот пустуючых і старых дамоў у сельскай мясцовасці. "Мы падрыхтавалі адпаведны праект указа, ён ужо ўзгоднены з усімі зацікаўленымі. У ім сапраўды будуць прадастаўлены пэўныя паўнамоцтвы (мясцовым уладам. - Заўвага БЕЛТА) і, самае галоўнае, - спрошчаны парадак", - сказаў Дзмітрый Матусевіч.

Напрыклад, у некаторых населеных пунктах дазволяць рэалізаваць такія аб'екты за 1 базавую велічыню (цяпер 1 БВ - Br29). Пры гэтым, адзначыў старшыня Дзяржкаммаёмасці, павінны быць улічаны інтарэсы ранейшых уласнікаў, якія ўжо рэальна не карыстаюцца або не хочуць карыстацца сваёй маёмасцю і зямельным участкам.

Дзмітрый Матусевіч расказаў і аб праводзімай інфарматызацыі. Паводле яго слоў, 2020 год паказаў, што інфармацыйныя рэсурсы Дзяржкаммаёмасці запатрабаваны не толькі самой сістэмай, але і знешнім контурам, гэта значыць нацыянальнай эканомікай. У прыватнасці, завершана работа над геаінфармацыйнай сістэмай "Лясныя рэсурсы" (сумесны праект з Мінлясгасам), якая дасць магчымасць на падставе зямельных карт планаваць развіццё лясной гаспадаркі.

"Калі гаварыць аб існуючых рэсурсах, колькасць запытаў вялікая. Толькі да рэестра нерухомай маёмасці звярталіся каля 40 млн разоў", - адзначыў старшыня Дзяржкаммаёмасці.

"Акрамя таго, ёсць неабходнасць ва ўдасканаленні нашага геапартала. Ён стаў не толькі асноўнай базай для работы ўсіх землеўпарадчыкаў, але нават кантралёраў. У нас створаны спецыяльныя модулі, і тыя, хто ўпаўнаважаны на гэта, могуць пры правядзенні сваіх пэўных мерапрыемстваў бачыць рэальную сітуацыю на тым ці іншым зямельным участку", - расказаў Дзмітрый Матусевіч. Прымяняецца геапартал і пры разглядзе зваротаў грамадзян.

Старшыня Дзяржкаммаёмасці адзначыў таксама шэраг рэсурсаў, якія будуць карысныя калегам. "Напрыклад, даўкамплектавалі рэестр адрасоў. У нас ёсць рэсурс крыніц на публічнай кадастравай карце, рэсурс выбарчых акруг. Прымеркаваўшы да Вялікай Перамогі, мы зрабілі рэсурс усіх помнікаў, якія знаходзяцца ў нашай краіне. Гэта дае ўсім карыстальнікам магчымасць у адкрытым доступе атрымліваць неабходную інфармацыю", - падкрэсліў ён.

Сістэма Дзяржкаммаёмасці, якой споўнілася 30 гадоў, паказала сваю стабільнасць, дадаў Дзмітрый Матусевіч. За 2020 год атрыманы добры фінансава-эканамічны вынік, былі выкананы ўсе асноўныя даручэнні Прэзідэнта і ўрада. Колькасць зваротаў грамадзян скарацілася на 10 працэнтаў, хоць па-ранейшаму застаецца даволі вялікай.

Гаворачы аб іншых выніках за мінулы год, старшыня Дзяржкаммаёмасці растлумачыў: "У нас у падпарадкаванні ёсць блок прамысловых прадпрыемстваў: "Беларуськалій", два холдынгі - "Белаўтадар" і "Белрэсурсы", яны таксама стабільна закончылі год, забяспечылі стабільную выплату заработнай платы, сацыяльны пакет, таму сістэма абсалютна ў рабочым стане".

Што датычыцца зарплаты ў сістэме Дзяржкаммаёмасці, у сярэднім яна большая за Br1,6 тыс. "Маладыя спецыялісты нават у Віцебску атрымліваюць Br1,8 тыс., праграмісты або тыя, хто звязаны з інфармацыйным забеспячэннем, - звыш Br2 тыс.", - звярнуў увагу Дзмітрый Матусевіч. Разам з тым ён заўважыў, што зарплата павінна быць зароблена, таму павялічыць яе ў гэтым годзе дасць магчымасць толькі выручка.