15 снежня, Мінск /Кар. БЕЛТА/. Пасяджэнне Савета па ўстойлівым развіцці адбылося 14 снежня ў Савеце Рэспублікі Нацыянальнага сходу, паведамілі БЕЛТА ў прэс-службе верхняй палаты парламента.

"2020 год вельмі важны не толькі для Беларусі ў плане рэалізацыі Парадку дня ў галіне ўстойлівага развіцця на перыяд да 2030 года, але і для ўсёй міжнароднай супольнасці. Гэта стартавы год, які запускае апошняе дзесяцігоддзе да заканчэння Парадку дня - 2030", - сказаў намеснік старшыні Савета Рэспублікі, нацыянальны каардынатар па дасягненні Мэт устойлівага развіцця (МУР) Анатоль Ісачанка. 

На яго думку, для Беларусі гэты год таксама з'яўляецца годам фарміравання новых стратэгічных дакументаў і планаў на наступны праграмны перыяд, якія таксама павінны быць гарманізаваны з Мэтамі ўстойлівага развіцця.

На пасяджэнні члены савета разгледзелі прагрэс Беларусі ў дасягненні МУР, а таксама абмеркавалі падрыхтоўку Нацыянальнай стратэгіі ўстойлівага развіцця да 2035 года, Праграмы сацыяльна-эканамічнага развіцця на 2021-2025 гады, дзяржаўных галіновых праграм. Таксама разгледжаны пытанні зялёнай эканомікі і ўстойлівага развіцця ва ўмовах змянення клімату.

"Ад таго, як мы сплануем нашы далейшыя крокі па развіцці краіны, будзе залежаць паспяховасць рэалізацыі Рэспублікай Беларусь Парадку дня - 2030. Дасягненне высокіх стандартаў узроўню жыцця насельніцтва, якасны рост эканомікі, фарміраванне паўнацэннага канкурэнтнага асяроддзя, стварэнне камфортных умоў для жыццядзейнасці і развіцця асобаснага патэнцыялу, захаванне прыродных сістэм для цяперашніх і будучых пакаленняў павінны стаць для нас асноўнымі прыярытэтамі", - адзначыў нацыянальны каардынатар па дасягненні МУР.

Удзельнікі савета падкрэслілі надзвычайную важнасць новых намаганняў і генерацыі ідэй, накіраваных на ўдасканаленне архітэктуры ўстойлівага развіцця.

У пасяджэнні савета прынялі ўдзел прадстаўнікі дзяржаўных органаў і арганізацый, агенцтваў сістэмы ААН, члены парламенцкай і партнёрскай груп па МУР.