07.02.2022

"Не толькі пажар будуць тушыць". Частку супрацоўнікаў МНС Беларусі плануюць узброіць

Частку супрацоўнікаў МНС плануюць узброіць, каб у выпадку канфлікту або ваенных дзеянняў яны маглі ў тым ліку быць задзейнічаны ў ваенных мэтах нараўне з арміяй. Гэта пытанне абмяркоўваецца на нарадзе ў Прэзідэнта Беларусі Аляксандра Лукашэнкі па ўдасканаленні структуры сістэмы МНС, перадае карэспандэнт БЕЛТА. 

"Супрацоўнікі МНС - хлопцы моцныя. І не толькі хлопцы. У мяне яны выклікаюць вельмі сур'ёзную павагу. Вось дзе б МНС ні было, яны адны з лепшых, калі не лепшыя", - падкрэсліў кіраўнік дзяржавы. 

У якасці прыкладу Аляксандр Лукашэнка прывёў парад, дзе супрацоўнікі МНС паказалі выпраўку не горш за ваенных. Яны таксама заўсёды ў лідарах па пажарна-выратавальным спорце, чэмпіёны свету. 

"Гэта імідж МНС. Я хілю да таго, што ўсе супрацоўнікі МНС, асабліва пры цяперашнім міністры, хочуць быць сілавым блокам. Сілавікі. Мы так іх і лічым. Але для таго каб быць сілавіком, трэба вельмі добра валодаць зброяй. Маё распараджэнне было, каб мы вызначылі ў МНС, якую частку мы будзем узбройваць: хто гэтыя хлопцы, дзяўчаты, якія там служаць, якія будуць насіць агнястрэльную зброю і будуць падрыхтаванымі выключна так, як, я сказаў, яны сябе ўсюды праяўлялі. Хацелася б пачуць, наколькі мы рушылі наперад у гэтым плане, каб МНС стала сілавым блокам па-сапраўднаму, колькі людзей у нас будзе валодаць зброяй не горш, чым у арміі і міліцыі", - сказаў кіраўнік дзяржавы. 

Аляксандр Лукашэнка падкрэсліў, што гэта важнейшы элемент: "Не можам мы ў краіне кампактнай, невялікай мець колькасць пастаянна дзеючых Узброеных Сіл 200-300 тыс. Мы дамовіліся, што колькасць нашых Узброеных Сіл, арміі нашай - 65 тыс. На гэтым спыніліся. Але калі адбудзецца нейкі канфлікт, не дай бог вайна, у нас што, у МНС моцныя надзейныя супрацоўнікі будуць убаку? Не. Яны не толькі пажар будуць тушыць".

Такім чынам, з аднаго боку, супрацоўнікі МНС будуць ратавальнікамі. І другая функцыя - як узброеных людзей, якія, паводле слоў Прэзідэнта, у выпадку моманту ў час Ч устануць на абарону Радзімы. "А для гэтага трэба валодаць зброяй. Якой? Пісталеты, аўтаматы, кулямёты, гранатамёты, або мы іх будзем узбройваць яшчэ і нейкай тэхнікай? Думаю, так. І гэты актыў будзе, сур'ёзны актыў, і падмога для нашай арміі на выпадак, калі раптам", - заявіў Аляксандр Лукашэнка. 

Ён выказаў меркаванне, што і ў мірны час, мадэрнізуючы МНС, знойдзецца для іх работа як для ўзброеных людзей. "Гэта вельмі важна пры рэфармаванні. А не тое, што мы там клетачкі начэрцім: гэтага чалавека туды, гэтага - сюды. Гэта само сабой, але павінна быць істотная мадэрнізацыя", - сказаў кіраўнік дзяржавы. 

У размове з журналістамі, якая адбылася пасля сустрэчы міністра з кіраўніком дзяржавы, Вадзім Сіняўскі растлумачыў, што МНС пачало займацца прапрацоўкай пытання аб узбраенні супрацоўнікаў на выпадак канфлікту або ваенных дзеянняў амаль паўгода таму. Тады міністр быў з дакладам у Прэзідэнта і яму была пастаўлена адпаведная задача. Для яе вырашэння ўжо ўнесены неабходныя змяненні ў заканадаўства, ідзе падрыхтоўка асабовага складу, будынкаў і збудаванняў, дзе будзе захоўвацца тэхніка і ўзбраенне. "Мы падрыхтавалі разлікі, вызначылі колькасць людзей, якіх можам пры неабходнасці адмабілізаваць, і пачалі з імі падрыхтоўку, у тым ліку практычнага прымянення сіл і сродкаў", - сказаў Вадзім Сіняўскі.

Паводле яго слоў, у МНС будзе сфарміраваны рэзерв асабовага складу для таго, каб яны маглі дзейнічаць разам з супрацоўнікамі Міністэрства ўнутраных спраў у мірны час, а ў выпадку ваеннай пагрозы - разам з ваеннаслужачымі Міністэрства абароны.