10.04.2020

Нацыянальная сістэма медыявымярэнняў ствараецца ў Беларусі

Прэзідэнт Беларусі Аляксандр Лукашэнка 9 красавіка падпісаў указ нумар 122 "Аб стварэнні сістэмы медыявымярэнняў", паведамілі БЕЛТА ў прэс-службе кіраўніка дзяржавы.

У адпаведнасці з дакументам, пад медыявымярэннямі маецца на ўвазе сістэматычны збор, аналіз, захоўванне і распаўсюджванне даных аб глядацкіх і слухацкіх густах аўдыторыі тэлевізійных і радыёвяшчальных сродкаў масавай інфармацыі.

Ва ўказе вызначаны асноўныя прынцыпы дзяржаўнага рэгулявання і функцыянавання сістэмы медыявымярэнняў. Прадугледжваецца, што праводзіць медыявымярэнні будзе адзіны нацыянальны медыявымяральнік.

Спецыяльна ўпаўнаважаным дзяржаўным органам у сферы медыявымярэнняў з'яўляецца Міністэрства інфармацыі. Яно выбірае медыявымяральніка, устанаўлівае патрабаванні да яго, падставы і парадак спынення яго паўнамоцтваў.

Прыняцце ўказа дасць магчымасць стварыць нацыянальную сістэму медыявымярэнняў, адпаведную сусветным стандартам, будзе садзейнічаць развіццю рынку рэкламы ў Беларусі.-0-

НАВIНЫ БЕЛАРУСI