16 снежня, Мінск /Кар. БЕЛТА/. Пашпарты, тэрмін дзеяння якіх падоўжаны на шэсць месяцаў, дзейнічаюць толькі ўнутры краіны, паведаміла намеснік начальніка ўпраўлення прававога рэгулявання канстытуцыйнага будаўніцтва і праваахоўнай дзейнасці галоўнага ўпраўлення нарматворчай дзейнасці ў сферы дзяржаўнага будаўніцтва Міністэрства юстыцыі Марына Мельнікава ў эфіры радыёпраграмы "Актуальны мікрафон" на Першым нацыянальным канале Беларускага радыё, паведамляе БЕЛТА.

"Згодна з пастановай, якой вызначаны пералік гэтых дакументаў (тэрмін дзеяння якіх падаўжаецца на шэсць месяцаў. - Заўвага БЕЛТА), падоўжаныя пашпарты грамадзян не з'яўляюцца дзеючымі для перасячэння дзяржаўнай граніцы, - адзначыла Марына Мельнікава. - Выключэнне складаюць толькі тыя выпадкі, калі падоўжаныя пашпарты прызнаюцца замежнымі дзяржавамі на падставе заключаных з нашай краінай двухбаковых пагадненняў. Калі такой дамоўленасці няма, значыць, пашпарт можа быць выкарыстаны грамадзянінам толькі на тэрыторыі нашай краіны".

Намеснік начальніка ўпраўлення растлумачыла, што ў грамадзян і юрыдычных асоб няма абавязку звяртацца ва ўпаўнаважаны орган за выдачай новых дакументаў і рашэнняў, у тым ліку пашпарта, калі тэрмін іх дзеяння закончыўся або заканчваецца з 10 лістапада 2020 года па 10 мая 2021-га. Уладальнікі могуць карыстацца наяўнымі ў іх дакументамі яшчэ на працягу шасці месяцаў.

"Калі тэрмін дзеяння пашпарта заканчваецца, напрыклад, 10 лістапада бягучага года, гэты пашпарт будзе дзейнічаць да 10 мая 2021-га. Грамадзяніну не трэба нікуды звяртацца за яго падаўжэннем, прастаўленнем нейкіх адзнак", - адзначыла Марына Мельнікава.

Разам з тым калі тэрмін дзеяння пашпарта заканчваецца ў названы перыяд, яго ўсё роўна можна падоўжыць, напрыклад, для перасячэння граніцы. "Аўтаматычнае падаўжэнне тэрміну дзеяння дакумента не перашкаджае ні грамадзянам, ні юрыдычным асобам звярнуцца ў кампетэнтны орган. У такім выпадку дзяржорган абавязаны разгледзець заяву і выдаць дакумент у звычайным парадку", - звярнула ўвагу спецыяліст.

Паводле слоў намесніка начальніка ўпраўлення, пералікі сфарміраваны на падставе прапаноў дзяржаўных органаў, якія выдаюць адпаведныя дакументы. Падчас першай хвалі каранавіруса прымалася ўжо такое рашэнне. "Зыходзячы з папярэдняга вопыту, было прынята рашэнне аналагічнага характару. Нейкія дакументы былі выключаны з пераліку, нейкія новыя з'явіліся. Улічваўся прынцып разумнасці і мэтазгоднасці. Калі дзяржорганы бачылі, што гэтыя дакументы не запатрабаваны насельніцтвам, адпаведна ў пералік яны ўжо не ўключаліся", - дадала яна.

У пералік адмінпрацэдур па заявах грамадзян уключаны 190 працэдур. Гэта прыняцце рашэння аб прадастаўленні аднаразовай субсідыі на будаўніцтва (рэканструкцыю) або набыццё жылога памяшкання, выдача даведак аб знаходжанні на ўліку маючых патрэбу ў паляпшэнні жыллёвых умоў, аб займаемым жылым памяшканні і складзе сям'і, аб месцы жыхарства, выдача даведкі аб стане здароўя і інш.

Для юрыдычных асоб працэдуры іншыя, але тэрмін дзеяння дакументаў падаўжаецца ў тым жа парадку. Размова ідзе, у прыватнасці, аб дазволах на размяшчэнне сродку вонкавай рэкламы, набыццё і захоўванне зброі, шэрагу іншай дазвольнай дакументацыі, у тым ліку на ўвоз і вываз пэўных тавараў. У параўнанні з папярэднім рашэннем, якое было прынята вясной, пералікі падаўжаемых дакументаў папоўніліся такімі новымі дакументамі, як акт абавязковага перыядычнага медыцынскага агляду, пасведчанне па ахове працы, прыродаахоўны дазвол, кваліфікацыйны атэстат спецыяліста рынку каштоўных папер, пасведчанне аб дзяржатэстацыі санаторна-курортнай арганізацыі.