27.02.2025

Завяршыць распрацоўку бураломаў і аднавіць лес пасля ліпеньскага ўрагану. Тэрміны і аб'ёмы абмеркавалі ў Жлобіне

Намеснік прэм'ер-міністра Віктар Каранкевіч азнаёміўся з ходам выканання даручэнняў кіраўніка дзяржавы па ліквідацыі наступстваў ліпеньскага ўрагану ў Гомельскай вобласці, перадае карэспандэнт БЕЛТА.

Выязное пасяджэнне штаба "Аб распрацоўцы лясных насаджэнняў, пашкоджаных моцнымі вятрамі ў ліпені 2024 года" пад кіраўніцтвам намесніка прэм'ер-міністра Віктара Каранкевіча праходзіць у Жлобінскім лясгасе. Віцэ-прэм'ер абазначыў, што апошнім часам неспрыяльныя ўмовы надвор'я перыядычна наносяць урон лясной гаспадарцы. Так, у сярэдзіне лета стыхіяй было пашкоджана 48,1 тыс. га ляснога фонду. З іх суцэльныя высечкі былі неабходны на больш як 21 тыс. га, найбольш пацярпелі Гомельская і Магілёўская вобласці.

З сярэдзіны лета мінулага года лясгасы з усёй краіны акумулявалі сілы на ліквідацыі наступстваў ураганнага ветру ў паўднёва-ўсходнім рэгіёне, які прыняў на сябе самы моцны ўдар стыхіі. Гэта пытанне знаходзілася на асабістым кантролі кіраўніка дзяржавы.

Тэрмін устаранення наступстваў - да 1 сакавіка. Лесааднаўленне прадоўжыцца вясной.

Міністр лясной гаспадаркі Аляксандр Кулік запэўніў: пастаўлена задача завяршыць лесааднаўленне на бураломных участках пасля ліпеньскага ўрагану гэтай вясной. "Правядзём другі этап акцыі "Дай лесу новае жыццё!", запросім валанцёраў. Як сказаў Прэзідэнт, удзельнічаючы ў гэтай акцыі, усёй талакой выйдзем на пасадку лесу", - падкрэсліў ён.

Старшыня Гомельскага аблвыканкама Іван Крупко прапанаваў і падтрымку ад рэгіёна, у прыватнасці, арганізаваць работу студэнцкіх атрадаў, падключыць мясцовыя прадпрыемствы.

Ініцыятыву падтрымаў віцэ-прэм'ер, адзначыўшы, што "лішніх рук у лесе не бывае", і прыцягваць валанцёраў не толькі ў выхадныя, але і будныя.

Пасля пленарнай часткі - выезд на лесасекі. У маршруце - некалькі пунктаў на тэрыторыі Жлобінскага раёна.

БелТА