29 студзеня, Мінск /Кар. БЕЛТА/. Вызначыліся пераможцы і прызёры чэмпіянату Беларусі па лёгкаатлетычным мнагабор'і ў Гомелі, паведамляе карэспандэнт БЕЛТА.

У жанчын, якія выступалі па праграме пяцібор'я (бег на 60 м з бар'ерамі, скачок у вышыню, штурханне ядра, скачок у даўжыню, бег на 800 м), пераможцай стала Яна Максімава, якая прадстаўляе на гэтых стартах каманды Віцебскай і Гомельскай абласцей. Перамогу ёй прынеслі 4244 балы. Серабро выйграла спартсменка з Магілёўскай вобласці Юлія Роўт з рэзультатам 4169 ачкоў. Замкнула тройку мацнейшых Шарлота Паэглітэ з Гродзенскай вобласці - 3968 балаў.

У спаборніцтвах мужчын, якія выяўлялі мацнейшага па праграме сямібор'я (бег на 60 м, скачок у даўжыню, штурханне ядра, скачок у вышыню, бег на 60 м з бар'ерамі, скачок з шастом, бег на 1000 м), першынстваваў атлет з Гродзенскай вобласці Максім Андралойць - 6057 ачкоў. Другое месца заняў яго зямляк Юрый Ярэміч (5950 ачкоў), для якога гэта лепшы рэзультат у кар'еры. Бронзавы медаль на рахунку мнагаборца з Брэсцкай вобласці Артура Пеляшонка, рэзультат якога (5343 ачкі), таксама стаў для спартсмена лепшым у кар'еры.