Больш за 64 тыс. куб.м драўніны вывезлі на прамежкавыя склады лясгасы Гомельскай вобласці з лясоў рэгіёна пасля студзеньскай стыхіі. Такую інфармацыю апублікаваў Telegram-канал "Гомельшчына афіцыйна" са спасылкай на генеральнага дырэктара Гомельскага ДВЛГА Юрыя Ліпскага, паведамляе БЕЛТА.

Пасля буралому ў рэгіёне правялі дэталёвае абследаванне. Ва ўсіх лясгасах аб'яднання выявілі 927 пашкоджаных участкаў, агульная пацярпелая плошча - 4546 га. Больш за ўсё пацярпелі лясныя гаспадаркі Мазырскага, Гомельскага, Рэчыцкага, Веткаўскага і Жлобінскага раёнаў.

Для ліквідацыі наступстваў стыхіі, распрацоўкі бураломных насаджэнняў штодзённа задзейнічалі больш за 300 чалавек і 140 адзінак тэхнікі. "У адведзеныя тэрміны праведзены суцэльныя і выбарачныя санітарныя высечкі, прыбіранне захламленасці. На сённяшні дзень усе работы завершаны. Лясгасы вобласці ўжо вывезлі на прамежкавыя склады 64,5 тыс. куб.м драўніны. Рэалізавалі 56,4 тыс. куб.м, палавіна - для ўласных патрэб", - адзначылі ў ДВЛГА.