12.06.2025

Іх галоўная каштоўнасць – жыцці людзей: у Гомелі напярэдадні прафесійнага свята ўшаноўвалі работнікаў аховы здароўя

Урачыстая цырымонія прайшла ў ГКЦ. Удзел у ёй прыняў памочнік Прэзідэнта-інспектар па Гомельскай вобласці Руслан Пархамовіч, а таксама прадстаўнікі кіраўніцтва вобласці і горада, Міністэрства аховы здароўя і галіновага прафсаюза медыкаў, абласнога аб'яднання прафсаюзаў.

– Медыкі суправаджаюць наша жыццё ад моманту нараджэння. Мы звяртаемся да вас, калі баліць цела і душа. Дзякуй за працу, якую вы выконваеце штодня. Яна не заўсёды прыкметны, але неабходна людзям, – адзначыў намеснік старшыні аблвыканкама Дзмітрый Алейнікаў. – Дзяржава ў сваю чаргу надае асаблівую ўвагу пытанням захавання здароўя насельніцтва і паляпшэння якасці медыцынскага абслугоўвання.
У пацверджанне гэтых слоў ён распавёў, што ахоп дыспансерным аглядам насельніцтва склаў амаль 98%. Летась нашы ўрачы зрабілі пад 26 тысяч высокатэхналагічных і складаных аператыўных умяшанняў, штогод у вобласці выконваецца больш за 400 аперацый на адкрытым сэрцы, каля 40 – па перасадцы нырак. Расце і ўзровень даступнасці дапамогі людзям з сельскай мясцовасці дзякуючы працы міжраённых медыцынскіх цэнтраў і аддзяленняў.

Да ўрачоў таксама звярнуўся намеснік міністра аховы здароўя Беларусі Аляксандр Старавойтаў. Ён заўважыў, што людзі, якія прысвяцілі свае жыцці дапамогі іншым, рэдка могуць сабрацца ў адным месцы. Аднак у гэты дзень яны аб'ядноўваюцца і атрымліваюць віншаванні ад удзячных жыхароў нашай краіны.

– У Беларусі працуюць больш за 300 тысяч медработнікаў. Медыцына не стаіць на месцы – гэта жывы арганізм, які ўвесь час развіваецца, – лічыць Аляксандр Старавойтаў. – У гэтым плане Гомельскай вобласці асабліва пашанцавала, бо тут створаны цэлы комплекс з навучальных і лячэбных устаноў. У вас выдатныя вынікі.

Медыкі, якія вызначыліся з розных куткоў нашага рэгіёну, былі ўдастоены ганаровых грамат і падзяк за значны ўклад у развіццё аховы здароўя і аказанне медыцынскай дапамогі насельніцтву.