13.06.2023

Гомель рыхтуецца сустракаць гасцей традыцыйнага фестывалю прыгранічных абласцей Беларусі і Расіі "Славянскае адзінства"

Асноўная праграма запланавана на 24 чэрвеня, яна распісана з самай раніцы да позняга вечара.

Пачнецца ўсё з малебна ў саборы Пятра і Паўла абласнога цэнтра і памятных мерапрыемстваў каля Вечнага агню. Затым – шэсце афіцыйных дэлегацый.

Дзе сапраўды будзе маляўніча і ярка – дык гэта ў цэнтральным парку. Ад Кіеўскага спуску да самых куткоў набярэжнай разгорнуцца гандлёвыя і рамесныя рады, тэматычныя лакацыі, канцэртныя і гульнявыя пляцоўкі. Тут пройдзе фестываль кавер-бэндаў, конкурс графіці, для гасцей правядуць экскурсіі, арганізуюць тэатральныя перфомансы, фальклорны фестываль, модны базар. Ніяк нельга прапусціць гістарычную рэканструкцыю каля «Лодачніка» – яна абяцае быць грандыёзнай.

І ўжо сапраўды ніхто не застанецца галодным: пра гэта паклапоцяцца ўдзельнікі фестывалю вулічнай ежы.

Суправаджаць культурную праграму будзе міжнародная спартакіяда "Дружба" на стадыёне "Луч".

Самай гучнай і відовішчнай кропкай стане канцэртная пляцоўка на новай набярэжнай, дзе выступяць вядучыя творчыя калектывы Гомельскай вобласці і запрошаныя з Расіі артысты. Тут будзе і феерверк.

Маштабнае свята арганізуюць і для моладзі, і для дзяцей. Яны сустрэнуцца ў міжнародных лагерах «Дружба-2023» і «Крыніца славянскага сяброўства».

У гэтым годзе фестываль прысвечаны Году міру і стварэння.