04.03.2022

Дэлегацыі Башкортастана і Пермскага края азнаёміліся з вытворчасцю гомельскага завода ліцця

Дэлегацыі Рэспублікі Башкортастан і Пермскага края Расійскай Федэрацыі пабывалі ў ААТ "ГЗЛіН", паведамляе БЕЛТА са спасылкай на прэс-службу холдынга. 

Дэлегацыі азнаёміліся з вытворчымі плошчамі прадпрыемства. Яны пабывалі ў зборачным корпусе, цэху вырабаў з металу, азнаёміліся з ліцейнай вытворчасцю. 

"На ўсе пытанні, якія цікавілі гасцей, адказалі намеснік дырэктара прадпрыемства па камерцыйных пытаннях Дзмітрый Сарокін і начальнік бюро аддзела продажаў па рэалізацыі на экспарт Ігар Каварда", - расказалі на прадпрыемстве. Бакі зацікаўлены ў супрацоўніцтве. 

Адкрытае акцыянернае таварыства "Гомельскі завод ліцця і нармалей" уваходзіць у склад холдынга "Гомсельмаш", спецыялізуецца на вытворчасці сельскагаспадарчых машын, адлівак з чыгуну, сталі і каляровых сплаваў, машынабудаўнічага крапяжу, а таксама ліцейнай аснасткі, нестандартнага абсталявання.