22 кастрычніка, Гомель /Кар. БЕЛТА/. Выстаўка фатаграфій Святланы Дзідкоўскай "Музыка ў аб'ектыве" адкрыта ў Музеі друку і фатаграфіі Гомельшчыны, паведамілі БЕЛТА ў Музеі гісторыі горада Гомеля.
У экспазіцыі - канцэртныя фатаграфіі, зробленыя з 2013-га па 2019 год. На здымках адлюстраваны выступленні Томаса Андэрса (Modern Talking), Ане Вескі, Il Volo, Таццяны Буланавай, Філіпа Кіркорава і іншых вядомых артыстаў.
"Святлана Дзідкоўская сваімі работамі знаёміць нас з творчасцю музыкантаў, атмасферай канцэртаў так, што складваецца ўражанне, што знаходзішся побач і адчуваеш тыя ж эмоцыі, што і гледачы на стадыёне, у зале", - расказалі ва ўстанове.
Арганізатары адзначылі: цікавасць да канцэртнай фатаграфіі з'явілася ў аўтара з каляднага канцэрта Томаса Андэрса ў горадзе Кобленц (Германія). "Гэта быў першы артыст у кадры Святланы Дзідкоўскай. Ёй хацелася запомніць канцэрт лепш, захаваць эмацыянальныя моманты", - дадалі ў музеі.
Святлана Дзідкоўская - мастак па драўнянай скані, прызёр рэспубліканскага фестывалю рамёстваў "Вясновы букет".
Выстаўка будзе працаваць па 17 лістапада.